分類: Uncategorized

話說呢排又開始wfh, 所以有時間再睇多啲書，再試多啲嘢，同埋有得瞓到自然醒，所以身體超級健康超級有精神呀！等我講吓呢啲保持身體健康嘅方法邊種對我效用最大啦～

1. 食啱嘢
2. 柯便便
3. 做運動輕輕出汗
4. 食得足
5. 曬太陽
6. 瞓得足
7. 刷牙

5/8/2021 係Carousell 買左個無印手動碎紙機，好好玩好舒壓。如果淨係要清機密文件嘅話，點睇都係手撕最快最方便架啦。但係用碎紙機嘅話，你可以玩佢啲好整齊流出嚟嘅蘇～聽佢好爽脆嘅聲音～呀～真係幾好玩 (^_^)v

夏天流流，我係度諗，究竟買把普通DC 風扇好呀定係比多少少買把慳電AC 風扇好呢？於是就整咗呢個香港電費計數機啦～呢個仲可以用嚟計下值唔值得換過啲慳電電器架。

1. 每度電費預設為1.188，是港燈501-700度區間的每度電費。

2. 香港電費簡略如下:

HK Electric (2021):

CLP (2021):

3. 港燈有一個電器用電量一覽表，可按此。

濕疹咗十幾年，你要努力同佢共處，可能就會閂咗自己嘅感受，去麻痺自己唔去感覺，去催眠自己無乜事無乜辛苦，將自己嘅感受從身體抽離出去。日子一久，你可能已經唔記得身體健康嘅感覺係點。但係唔緊要，隨住你將意識帶進身體，你會感受番身體帶比你嘅訊息—可能係酸痛、腫脹、頭暈、無力、虛弱、不憤、怒氣、氣促、心痛… 唔緊要嘅，有訊息就係比提示你可以往邊個方向努力。而不適唔會永恆，隨住慢慢好轉，你會愈來愈實在同集中，然後生活好多方面會跟著好轉。呢啲步驟都需要時間，等我講下我好轉前後嘅感受下～

精神

我睇過篇文章分享憂鬱症康復嘅感受。佢地覺得自己一路被困係一間密封嘅房入面，而康復就好似間房終於開左一扇窗咁。我就將呢個形容想像成海邊城堡高塔中開左一扇落地超寬大玻璃窗咁，睇到夏天的藍配上白色充滿動感層次感的雲，再輕輕吹嚟一陣海風～呼～係咪好有場景呢。我覺得濕疹好轉都有呢種豁然開朗嘅感覺。你會覺得身體同情緒都爽朗咗，好似有風同光進入個心咁。好多以為無可進退的事，都突然多咗選擇，思路清晰埋。

肚餓/食飽

我本身個肚係keep 住脹脹地，有時會胃痛，感覺唔到係飽定餓嘅，食飯只因為夠鐘應該食飯。因為中醫認為濕疹原因係脾胃差，所以有中醫問過我當時覺唔覺得胃唔舒服。但果時真係完全感覺唔到有問題架。直到後尾慢慢好轉，亦都因為研究下穴位，先知道有個飽飽脹脹又緊緊實實嘅感覺係度。你地都可以試下按雞心直到肚臍呢啲位，感覺好明顯的。而家？會知飽知脹嘅，但知餓就未時時做到啦。我諗呢個係終身事業嚟，因為思傷脾嘛。

眼訓

我以前有兩個狀況嘅，一係感覺唔到眼瞓，二係想瞓但不能。

第一感覺唔到眼瞓係因為感覺渙散->精神渙散->思想渙散。唔知你有無呢個過程，但我會因為咁而感覺不到身體嘅睡意，都發覺唔到理解能力低咗好多。點樣解決呢，集中精神係呼吸上面，感受空氣進入嘅路徑同感受（感受事實+感受個感受），集中注意力去發現而家精神唔好，需要放鬆同休息。但唔係渙散地感覺一大個部分的感覺，係集中到你所能感受到的最細單位，加上聆聽呢個無聲的環境。好神奇呢，原來集中係一個放鬆嘅方式嚟喎。

第二係眼光光失眠，我都好耐無試過啦，記得果陣會失眠到頭暈暈想嘔咁個心跳得好快都仲瞓唔到。回想起可能係因為有啲情緒係你身體流竄，又無好好理解接受同安放個情緒（記住情緒唔係要嚟控制架）。

而家呢我只係因為唔想瞓所以唔瞓XD 如果要啲幫助，用Balance 呢個app 呼吸下聽聽下就會瞓著咗。仲有一個諗法都幾好，就係決定將今天完結，去休息迎接全新的明天。

講完點樣令自己瞓著，咁眼瞓嘅感覺係咩呢？對我就係感到思路變得遲鈍，有一陣霧係度，吸收唔到睇緊嘅資訊，帶有少少嘅頭暈咁。

訓醒

以前瞓醒係無瞓醒嘅感覺嘅，只係覺得太陽出來了，又要拖著身軀打住喊路咁落床。我一路都無懷疑過有咩問題，因為我真係比太多人（因為瞓唔到）夜瞓。只係直到上年2020年，我開始幫間房斷捨離呀清潔呀同埋用UV 燈，先發現間房空氣太差先係主因。而家瞓醒，可能even 只有五六個鐘，但會感到身體係有叉到電嘅，思路會清晰開朗咗。可惜係隔離房我有做足呢啲功夫，但老人家用得耐有感情唔肯換咗個廿幾年發霉脹咗嘅衣櫃，我到而家只係行入去都有一陣昏昏沉嘅感覺。

去完便便

Um… 早起身真係易啲有便意嘅。便完之後會精神爽利一身輕，個腦即刻活躍咗，會覺得自己啲血乾淨咗添 XD

刷完牙

同呢度講嘅一樣啦，刷得好會令到你第二朝維持一個神清氣爽嘅感覺，會將夜晚瞓覺成效加倍～又或者咁講，刷得唔好可以令到你休息成效減低架。

輕輕風吹

以前會覺得呢種接觸好似搵風吹一個玻璃樽，而我就係個玻璃樽咁。個玻璃樽本身可能係凍係熱，風吹嚟會感到溫差，或者可能感覺番玻璃樽本身嘅濕笠笠咁。而家吹風係會感覺比較通透嘅。

笑

我本身就比較木口木面嘅，當濕疹上面果陣，會感覺到塊面有啲阻力阻止佢郁咁，所以更加少郁動。有時心情係由表情帶動嘅，例如塊面笑得多，你心情都會變好咁。依啲阻力會令你更木口木面，心情都會變一般了。而家皮膚好番啲、滋潤啲，表情動作容易咗，心情都會敏捷有變化番。

話說要搵本好書原來都好艱難。我正正常常去書局買本食療書，啲文全部都有citation，作者係Medical Doctor，又出名做過好多演講。點知後尾係第二個網搵到佢引文超級斷章取義，甚至個reference 直程係suggest 緊相反嘅嘢… 你睇做人幾艱難，去到邊都要小心比人呃。

以下係我搵到好好睇嘅書同網頁～好推薦架，快啲望下：

呢句野有兩種情況會出現，一，你係講果個，二，你係聽果個。如果個標題係你親身經歷，咁我真心恭喜你，你搵到適合你嘅方法。但多數嚟講你會係聽果個。濕疹得咁上下年數嘅，都會比人用呢句嘢撻過，遇到個關心你嘅會話：不如我介紹個醫生比你呀～遇到個黑心嘅，就會質疑你懶啦、唔肯戒口唔食藥唔搽藥膏啦、一定係成日食垃圾食物啦…

大佬，病情有輕重，身體狀況每個人唔同，身處環境又唔同。如果乜嘢都係啪一粒藥搽一支藥膏就好，呢個世界就無咁多濕疹病人啦。或者咁講，如果每種病都咁簡單可以醫好，就唔使起咁多醫院啦。（係咪好好人呢我，我無問候人呀！！！）

呼～不過呢，面對關心我地嘅，我地心領神會啦；面對黑心嘅，就諗下：呢個世界好多無知又大大聲講嘢嘅人，既然你咁廢，我都費事彩你。

如果你係果個好心又一次就醫好濕疹嘅人，對住其他嚴重患者，不如直接比啲支持同鼓勵，但唔好再叫佢地做啲咁初階嘅嘢啦。信我，你試過嘅，佢地一定已經試過。好多時病到咁上下，已經無乜心力再試東試西，要嘅，可能只係一啲支持。當佢地儲夠心力嘅時候，再聽到一啲新嘅方向時，就會有番力量去做要做嘅嘢架啦～

終於無咁痕，個身啲sensor 開番晒，係咪開始睇啲雜物唔順眼/ 聞到陣味唔聚財呢？
呢個就係最啱執屋嘅時候啦！

「斷」＝斷絕不需要的東西
「捨」＝捨去多餘的廢物
「離」＝脫離對物品的執著

如果無乜頭緒，你可以問自己：

• 對上一次幾時用佢？
• 你仲會唔會用佢？
• 仲適唔適合你？
• 會唔會對你健康有負面影響？
• 留佢係度會令我更幸福嗎？

準備物品：

• 口罩
• 手套
• 大垃圾膠袋

原則：

同類的東西全部集中後，再一口氣判斷

先後次序：

衣服＞書籍、文件、小東西＞最後先係有特別回憶嘅物品

呢度skip 得太多，有興趣可以睇書：

斷捨離
怦然心動的人生整理魔法

斷捨離 極簡主義 簡單生活 | 香港 呢個Facebook group 好活躍，可以睇到好多分享。

Aim: 搞番好條腰骨同啲肌肉

Method: 公司坐直唔托頭一個月

13/8 坐直一下午～

12/8 做完物理治療條腰好舒服，但治療師發現我跪姿平衡超弱… 好啦，練下啦

2-5/8 直左幾秒就托番……….

30/7 唔提自己就會唔記得

29/7/2021 好努力做

Aim: 啲陳年玻璃窗貼係咪令間房好焗嘅兇手呢？

5/8 係無幫助嘅

2/8 清埋第四格窗啲膠。

31/7 用咁松節水好努力抹咗兩個鐘，清咗九成，淨低果啲下次再繼續啦。唔知係咪聞得多所以唔覺臭，所以都未知間房有無好咗。

27/7/2021 終於撕咗三個窗嘅玻璃窗貼啦，咁當然又係有啲奇怪黃色漬係度啦。有好多膠水漬仲留係個窗度，好臭膠水味，下回繼續。

Aim: 睇下我係咪對牙膏入面嘅SLS 敏感

Results: 做運動出汗對皮膚最好。牙膏SLS 影響太細。

9/5 太陽好曬，用防曬之前有用Squarane，總共用左兩次金色防曬。番到屋企用洗面洗左佢，再補Squarane。訓醒～無事～太好了

7/5 計計埋埋自從用番茶籽粉唔用洗頭水+做左兩次出汗運動+訓到自然醒+走SLS 牙膏，眼角皮膚已經好左八成。呢啲動作都好sustainable，所以會keep 住架啦。遲啲懶番先再睇咩野出事啦。

6/5 無惡化。

5/5 曬左8 個鐘，無出汗，用左兩次藍色防曬，無事！！！皮膚無差到。今次我係用胺基酸洗面奶洗面再加摔走啲死皮加防水。唔知係啲死皮幫我擋一擋定係清得走啲防水所以無事。乜都好，星期日應該會用金色防曬，睇下會唔會出事。

2/5 睇嚟運動搞到皮膚好咗，而且仲好持久添。用番無SLS 牙膏，仲有牙縫刷。出現嘅variable 太多，mastermind 唔到添。

1/5 行完山猛咁出汗，皮膚好左

29-30/4 用牙粉，無進展。

28/4 用番牙粉，無進展。

27/4 繼續用無SLS 牙膏，無進展。

26/4 可能琴日出左一身汗，所以心理上覺得紅色退左啲啲。今日搵到隻無SLS 有fluoride 嘅牙膏，今晚試下。

25/4 今日行山三個幾鐘，無搽防曬。夜晚打邊爐狂食牛仲飲左大半罐啤酒。繼續梳打粉刷牙。睇左好多Reddit 濕疹嘅文，好開心有啲人用左幾年就搵到咩事，但都有啲人病左十幾年無乜起色，生活難過，唉。係中文網搵唔到有人對牙膏敏感，係Reddit 搵到有，但人地只係爛口。唔通我塊面唔關牙膏事？

24/4 飲左一罐可樂、半支梳打水，健康到呢。塊面好似少左好多紅印，笑起上嚟啲魚尾紋無咁明顯。係PubMed 搵下梳打粉同Bentonite clay 嘅文，似乎無乜嘢support Bentonite clay 有用。如果亂用嘢刷牙可能仲會磨蝕隻牙添。

22-23/4/2021 唔記得係邊日開始，終於的起心肝用牙粉刷牙。

以下列咗一啲常見嘅濕疹致敏原同埋分類，資料大部分來自<<對症抗敏自療解方全書>>呢本書，另外亦有其他資料來源嘅，下面有寫埋。個人認為（其實係懶得搵source），一樣嘢可以令到你致敏，除咗因為佢真係同你唔夾，都可能係份量/ 濃度問題嘅。就好似啲藥咁，你食唔足量都會無效啦。所以留意自己身體反應最緊要，呢個係一個mastermind 嘅遊戲。

皮膚敏感可能原因

• 環境曝露
• 職業曝露
• 基因
• 皮膚類型
• 綜合因素

室內致敏原

• 塵蟎 – 尺寸較大，容易沉積
• 貓皮屑 – 主要由空氣傳播；貓砂盆含量高
• 狗皮屑 – 主要由空氣傳播；地毯含量高
• 黴菌孢子 – 主要由空氣傳播
• 蟑螂/ 老鼠過敏原 — 蟑螂過敏原：容易沉積，小鼠過敏原：主要由空氣傳播
• 倉鼠/ 老鼠/ 沙鼠 – 主要由空氣傳播

常見濕疹觸發物

• 賀爾蒙（因為賀爾蒙變化所引起的突然爆發，特別是女性）
• 刺激物（包含泡泡浴、洗頭水和肥皂；清潔劑、洗潔精、消毒劑和其他清潔產品；化學香料、香水和護膚品，粗糙的織品；新鮮果汁；蔬菜、堅果甚至來自動物的刺激物）
• 過敏原（包含塵蟎、動物皮屑、花粉、黴菌、織品染料）
• 微生物（包含像是金黃葡萄球菌、病毒、真菌細菌等）
• 食物（包含乳製品、蛋、堅果、小麥、種籽、大豆製品）
• 極端溫度與濕度，包含運動時排汗
• 壓力
• 太陽（對某些人而言是觸發物，對某些人則具有治療用途）
• 少部分人可能對類固醇乳霜過敏

常見化學物質敏感

呢度有兩個好好嘅網要介紹。

Skin Deep Environmental Working Group 整嘅，可以搵到化妝品、護膚品等嘅成分同安心度
CosDNA 比較似一個討論區，資料可能無咁準確，但有材料中文名

常見香料過敏

• Alpha Amyl Cinnamic Alcohol
• Cinnamaldehyde
• Cinnamyl Alcohol
• Hydroxycitronellal
• Geraniol
• Isoeugenol
• Eugenol
• Oak Moss

常見食物過敏原

• 牛奶
• 蛋
• 花生
• 木本堅果
• 魚
• 蝦蟹貝類
• 小麥
• 大豆

個人經驗

1. 如果你係接觸性敏感，敏感嘅位置同你最大量接觸敏感原嘅位置可能會唔一樣。例如我洗頭水敏感，但我手掌完全無事，頭皮得啲啲痕，但手背同手腕就會敏感。
2. 敏感反應係會延遲/累積嘅。例如我用某一隻洗頭水，可能用一次即刻出事。但用另一種，就會用三至五次先出事（兩個禮拜內）。
3. 好轉係要時間。雖然你已經即刻停止再接觸佢，但復原係要時間嘅。視乎個人體質，痕就可以快至一個鐘遲至兩三日就無事，紅腫甩皮通常三日內退到，裂咗結焦就幾日一定埋到口，瘡瘡就要個幾兩個禮拜啦。但以頭皮嚟講，唔接觸唔等如唔洗頭，你一定要淨係用清水洗頭嘅。

以上嘅敏感反應已經係我好番之後，再接觸果啲單一種致敏原嚟講。如果你仲未搵得出自己係咩事，斷咗A 致敏原但B 致敏原仲係度，就可能會睇唔出個效果。所以我地就要試下下面嘅系統性做法，搵出致敏原啦。

出面有好多付款嘅方法可以做各種測試，但因為果啲都係有限數量嘅，幾千蚊測幾樣嘢咁。如果錢包許可，又有醫生建議同解讀，都係幾好嘅方法。記得要留意番各種測試嘅限制同解讀方法。

而由於睇開嘅診所醫生唔肯比我做testing，同埋我係金牛座（笑），咁就要試下以下嘅方法啦。
呢個方法可以令你從茫茫人海中，跟據自己身體反應搵佢出嚟。
成本？一百蚊有找啦。

搵出濕疹致敏原的方法

1. 用你自覺最健康嘅方法生活兩個禮拜
2. 排除飲食試驗 food challenge
3. 排除埋可能會接觸敏感嘅嘢
   

1. 用你自覺最健康嘅方法生活兩個禮拜
   我都知，而家啲人都無乜幾多個係健康架啦。
   但人地唔健康得嚟無濕疹，而我地就有，你話呢個世界公平咩？
   唔… 但既然我地想好番，我地就要試下出盡全力去令自己最健康，然後再逐步逐步做番平時會做嘅嘢，搵下係邊出事啦。
   無錯，呢三點都係基於同一個原則：盡力回復，搵出問題，避開問題，回復生活。
   保持健康嘅方法我地幼稚園已經知，分別只在於我地願意為個效果做到咩程度。
   兩個星期對比十幾年，或者rest of your life 嚟講，只係眨下眼嘅事，話咁快就過啦。
   
2. 排除飲食試驗
   係呢個階段，營養師最驚你排除得太多，容易營養不良，所以一般嚟講西醫同營養師都唔建議你亂咁無止境地戒口。而呢個排除飲食試驗係一個系統做法嚟，唔同戒口。首先要將可疑嘅食物，移出日常飲食，可疑嘅食物指嘅係可能導致過敏的食物。一段時間過後（我自己set 做兩個禮拜，視乎你有無回復到可以睇得出其後發作的程度），您可以再次食用可疑的食物，但是要慢慢來，一次一種，排除有問題的食物，這樣有助於察覺到底是哪一種食物會引發症狀，並在記事本裡將相關的症狀記錄下來。過程中要有系統地逐一按不同分量進行測試，要細心觀察哪種食物、份量會誘發濕疹，以及發作程度。
   
3. 排除埋可能會接觸敏感嘅嘢
   原理同排除飲食試驗一樣。一定要有簿仔記低。
   咁要點清潔保濕同消炎呀？原則係用最簡單嘅配方（如果惡化可以追究），做最少嘅步驟（減少要追究嘅嘢），又唔令皮膚惡化（如果惡化我會對唔住你媽媽）。我唔可以叫你唔搽藥膏，但你都要留意下，搽咗會唔會令你惡化，因為有少部分人可能對類固醇乳霜過敏。
   

咁要排除啲咩，食啲咩，做啲咩呀？

可以睇下呢度 同 呢度 ，但呢啲都只係一個方向。要點樣食同點樣做，你知嘅唔會比我少，你嘅身體應該會最清楚添。我地缺少嘅可能只係一個有系統嘅做法（所以上面寫咗出嚟啦）將佢地串連埋一齊。

係呀，開始得架啦，快啲開始啦。

推薦：

異位性皮膚炎根治與保養教學！乳液保濕怎麼挑？醫師完整說明
濕疹如何預防、保養與根治？醫師3關鍵完整解答
濕疹患者7大搵食攻略
去過敏原飲食～幫您找出問題食物